Tentunya khutbah berbahasa daerah akan dipergunakan khususnya khutbah Idul Adha dalam bahasa bugis ini dapat dipergunakan khususnya yang penduduknya semua orang bugis karena khususnya pada daerah-daerah masing banyak orang tua yang belum mampu memahami bahasa Indonesia dengan baik dan benar.
Silahkan jadikan referensi dan semoga menjadikan manfaat kepada ummat mukminin.
Katobba Alleppereng Karobang
السلام عليكم و رحمة الله و بركاته
Alhamdulillah wasyukrulillah, teppaja
risompa nennia ripoji puang allah ta’ala, padatoha puang allah ta’ala teppaja
napaturung pammasena nennia pakkamasena ri ikkengmaneng. Nassabari natopada
engkaki makkatuda-tudangeng ri onrongewe nasaba seddi nia nennia akkatta
iyanaritu sikira-kira maeloki pasilennerengngi pakkasiwiatta lao ri puang allah
ta’ala. Nariappojiang tonaritu puang iya pancajiengi sininna alangnge, enrenge
rialatoni ritu passompung rio rennu rigauengkata pasilennerengngi sempajeng alleppereng
pittarae iyae essowe.
Salawa nenniya mappassalama masse lao ri
nabikkeng muhmmad saw nabi mallebbangnge pammasengenna ritu ri sininna
alangnge. Nassabari nakiengkana pada makkacoweriwi ritu, nakisalewangeng ritu
pole ri pettanna lino wanua paccobae. Narimakkuannanaro aja’ lalo
tapabbombangngi arota mita anu ritakkajenneki ri lino, toddo puli messei nasaba
uli tassape, nainappa ri tentuang ri laleng ati kaminang marilalengnge,
iyanaritu istiqamae makkatenni ri kitta’na puang allah ta’ala nenniya haddese
essana nabikkeng muhammad saw.
Allahu akbar
3 walillahilhamd
Mappakkoniro suara takabbere’e nenniya
mappoji-pojie lao ri puang allah ta’ala, ri pakkoling-koling “allahu akbar3
waalillahil hamd” samanna napakedo maneng lino lollong lise, riuh gemuruh
menusuk sukma, alun beralun menusuk rasa. Nainappa ri pakkoling paimeng allahu
akbar3 walillahilhamd” ri padecengi yengkalinga nainappa ri rasakan ri raleng
ati kaminang marilalengnge, majeppu ri rasakangngi makkeda temmakaharo pale
lebbi’na nenniya tanrena pappoji2e iyaewe, majeppu iyanae wettue saisanna taue
denaulle tahangngi esse babuana ri laleng atinna, denaulle tahangngi wae
matanna nasaba ningerreng mananni sijing sellenna iya mabela pole ri pakkita
matanna, selessurenna ri laleng sompereng, ana2na ri laleng pallawangeng, tau
matowanna iya de’e nasibawa malleppe ri lalenna iyae esso alleppereng pittarae
nasaba lesunna ri pammasena puang allah ta’ala “innalillahi wa inna ilaihi
rajiun”. Mompo manenni paimeng ri paringeretta samanna engkamanenni talleng ri
olo matatta, narimakkuannanaro upeppaha nappunnai idi iyae essoe engkaki
pasilennerengngi sempajeng alleppereng pittarae nasibawai keluarga yang
lengkap. Nasaba de nacedde selessuretta iyyae essoe maelo mewa manengi
siraga-raga nenniya sisompung-rennu keluargana, gangkanna tudammi bawang
takkajenne na taddunu-dunu wae matanna nangerreng manangi to ri pajajianna.
Narimakkuannanaro, narilalenna iyae wettu
rio rennue nenniya wettu asennange, aja lalo nakiangka cakkalupa lao ri tana ri
onroiyye makkalejja neniya langi ri jujunge. Pada laoni mai pada palebbangi
asennangetta nenniya pasisompungi rio rennutta lao ri iyamanenna selessuretta,
nasaba engkamopa saisa pole ri siajing selletta iyae essoe mappammula momfo’na
pajjarenge naengkalingana takabbere’e nainappa tudang takkajenne tetti wae
matanna, nasappurru duae arona, nassabari atinna nawa-nawai bakkaweng bola
tennulle sellei, anre sisanru, natenna ulle pasirapi’I, kuatopa paimeng saisa
pole ri siajing selletta engka beu-beu, aja’lalo tallupai nassabari namalomo
atinna, namalucca pappenaddinna, tawerengi sekke iyarega
passidekkasarekkoammengi nasisompung sumange’na,
tawerengi ada makassing sarekkoammengi nalai pakkurru sumange, nassabari napada
engka siporio siporennu iyae essoe. Atikekki pole ri adanna fuang llah ta’ala أرأيت الذى يكذبك بعد بالدين فذلك الذى يدع اليتيم و لا يهد على طعام المسكين: mupahang moga tau massekkerengi
agama sellenge yanaritu tau tuna2iwi ana beu-beu’e nenniya tau de’e napanrei
tau kasi-yasie.
Allahu akbar
3 walillahil hamd
Iyae essoe,
esso kemenanganna idi to mateppe’e pura mappuasangi uleng ramalang nasaba
siuleng ettana, ri tahang aleta pole ri dekkae, ri lupue enrenge pole ri
sininna gau-gau salae, kedo salae nenniya yamanenna weddinge solangi nenniya
lolloi appalanna puasata, sarekkoammengi engkaki pada mitau lao ri puang allah
ta’ala nenniya manini pole ri sininna pappesangkana. Sitongenna puasae tannia
bawang itahammi aleta pole ri lupu’e nenniya dekkae simata naiyakiya hakeka’na
iyanaritu kendalikangi hawa nafsue. Nasaba iyanae hawa nafsue musu kaminang
maraja ri sesena ikkeng rupa tau’e. Engka nengka nabitta muhammad saw lisu pole
ri perang badar makkedai nabitta “Raja’na Minal Jihadil Ashgar Ila Jihadil
Akbar” nakkutana sahabae makkeda engka mopaga musu kaminang maraja pole ri musu
badar’e e..surona puang allah ta’ala? Mappaebali nabitta makkeda “iyya” engka
iyanaritu musui hawa nafsue. Narimakkuannanaro aja’ laloki nakiengka melo
napakalonto-lonto hawa nafsutta, tainringi hawa nafsutta lao ri laleng na
purioe puang allah ta’ala namabela pole ri appatakabbelimpelinna setange.
Narimakkuannanaro tettongengi nasaba alefu’ narialefuki manengi ri sininna gau
salae narisampeng sininna ampekedo nacaccae puange, nainappa topada makketenni
ri apatiroanna agamatayanaritu kitabullah wasunnatu rasulillah. Timpa toni
koritu bittara temmennue, natopada makkalejja ri salangka bittarae,
nariattuppung lao ri awo lagadinge natopada tudang ri ase’na papang ulawenge,
nasaba tuntui rio simatana puang allah ta’ala.
Allahu
Akbar3 Walillahil Hamd
Upe’paha
nenniya alabangeppaha tau pura pasilennrengi puasa ramalange nasibawai teppe
simata lao ri puange, namusui hawa nafsunna, nakendalikangi alena pole
ricinnana nafsunna nassabari namcawe pammasena puange namabela
paccallannakoritu. Naiya tau lolongange pammase nenniya napabbarakkaki puasae
manessai ri tellue passeleng yanaritu:
1. Napahangi
alena makkeda saisani tau ri pancajinna puang allah ta’ala, idina rupa taue
kaminang makessing ancajingetta nenniya kaminang ri pakalebbi, padatoha narampawe
puang allah ta’ala: Laqad Khalqnal Insana Fi Ahsani Taqwim. Narimakkuannanari
aja lalo nakiengka melo solangiwi akessingetta nenniya alebbiretta iyya pura
nawerekki puange.
Uppanna-uppanna
rupa tau na turusiwi hawa nafsunna majeppu tau makkuero ri taroni ri onrong
kaminang mariyawae, nasaba tau makkuero napahallalai harange, napaharangi
hallalae, de’nakkeda hallala-hallulu nalulu maneng, malomoni lesseri janci
narusai aseddingenge nassabari namaroca pabbanuae, namasolang akkalinoange.
Makkedai passulessena ara’e “upe’paha tau engkae pancajiengi akkalenna
pamimpin, nenniya cilakapaha nappunnai tau pancajiengi nafsunna pemimpin ri
watakkalena
2. Napahangi
makkeda majeppunna alena sebagai khalifah iyarega pemimpin, pura ripahang
madecenni makkeda tungke2 rupa taue mancaji pemimpin manengi, natungke2
pemimping ri ellau pertanggung jawabanna matti ri essorimonrinna puang allah
ta’ala. Makkedana nabitta muhammad saw rilalenna haddese’na: “kullukum rain
wakullukum mas’lun anraiyyatihi” akkattana ritu de’gaga tau de’namancaji
pemimpin, nadettogaga seddi pemimpin leppe’ pole ri pakkutanana puang allah
ta’ala. Seddie kepala kampong ri tanai matti ri puang allah ta’ala makkeda
pekkogi pallao rumana pabbanuae, pekkogi carana pimpingi raya’e na pekkogi
carana jellokengi adecenganna masaraka’na DLL. Seddie kepala rumah tangga ri
tanai puang allah ta’ala pekkogi carana bimbingi wija2nna gangkanna mancaji ana
mattuju yanaritu ana malebu namalebu tello, maccaca namaccaca jarung, polei na
papole nyameng kininnawa, laoi nataro sengereng makkeguna lao ri agamana
nenniya lai ri kamponge. Enrenge paimeng tungke2 lao ri idi maneng rupa tau’e
ri utanaiki ri puang allah ta’ala pekkogi carata pimpingi watakkaleta,
kendalikangi hawa nafsutta sarekkoammengi na toli matturu lao ri parentana na
manini pole pappesangkana. Naparingerrangiki puange ri lalenna akorange
“walakad zara’na lijahannama katsiran minal jinni wal insi lahum qulubun
layafqahuna biha walahum azanun la yasmauna biha wa lahum a’yunun la yubsiruna
biha ulaika kal an’am bal hum adallun” ri pammulangi ranaka nasaba pole ri
bangsa jinge nenniya rupa tau’e yanaritu riwerengi ati (akkaleng) naekiya
denafakkegunai atinna, ri werengi parengkalinga naekiya de’napakkegunai
parengkalingana, ri werengi pakkita nekiya de’napakkegunai pakkitanna tau
mappakkuero padai laona olo’kolo’e bahkan lebbi majapi na olokoloe. Iyyakeppaha
akkalenna napakkegunai makkalangi nenniya gau bawangi padanna rupa tau,
parengkalingenna napakkegunai mengkalinga ada2 salah yarega bicara
temmakkeguna, kuaetoparo pakkitanna napakei kamata-mata gangkanna kakita-kita.
Iyamanennaro matti mancaji pammulanna api ranaka, narimakkuannanaro laoni mai
natopada pimpingi watakkaleta pada moi engkana lesang kuaetoparo iyya engkae
tallesenge, tapimpingi limatta aja nasembarang ikarawa, tapimpingi ajeta aja na
kajokka-jokka, tapimpingi ulutta aja nakacuru-curu tapimpingi timutta aja
nakatimu-timu, tapimpingi matatta aja nakamata-mata, tapimpingi atitta aja
namasiri ati enrenge rilainnae toparo.
3. Napahang
madecengalena makkeda atai pole ri paugn allah ta’ala. Naparentangekki
sarekkoammengiri sompai koritu, padatoha narampewe ri lalenna akorange “wama
khaqtul jinna wal insa illa liya’budun” ri pahanni onrotta selaku ata pole ri
puang allah ta’ala.aja tapa atai aleta pole ri saliwangenna puange, nenniya aja
tona ri puatai padatta ata, nasaba seddimi bawang engka atanna yanaritu puang
allah ta’ala simata. De’gaga wedding puatai atanna puang allah ta’ala
sangadinna alenami bawang, makkotoparo paimeng narekko napahangi alena ata, majeppu
napahattonitu makkeda degaga puang upuata sangadinna puang pancajiengi sininna
alange. Narimakkuannanaro parellui ripahang madeceng makkeda naiya ateka
essaae, ateka itarimae yanaritu ateka pannessaengi atangenna atae, nenniya
apuangenna puang. Nasaba yanae mancaji sabbi ri ada tongenge gau ri tarimae
nenniya ateka essae, ada tenrisabbingie, gau takketimbangang, ateka marusa.
Ateka marusae mannessei ri gau assisakkareng ada’e. Naiya ada assisakkarenge
gau tassilolongeng ateka mallinrunge, tassiomporeng pammase pole ri puang
sewwae, gau ri mannessae loroseng ada tongeng, tongappi mupuadai, mumalempu
taro gau-taro ada, ada singkerru ri mannessae, ati tettong mappattongeng
nenniya lanro ale gaukangi. Paddissengeng pappijeppuileteng singkerruange rupa
gau alettukeng passompa. Assompaki naluru appesona, mutonang jasang pettu ri
laleng ateka, naletei pammase nenniya pakkamasenapuang sewwae. Aja
tapabbombangi atekatta, naiya ada tongenge pole ri puang allah ta’ala “alhaku
min rabbik fala takunanna minal mumtarin”
Allahu
akbar3 walillahil hamd.
Riolo denapa
ri paccuppui katobbae, maeloka pangoloangi dua tellu pappasenna to panritata ri
makkedana:
1.
Sabbarakko tuttng pare’ mupogau passurong muniniriwi pappesangka. Ampe madeceng
appakkatuna alewe, asogirengi appssikkuae. Sukkuru’e singkerruang masse
antunru-tunru’e atammangingireng. Rioe teppettu rennu. Ikhlas appasimata-matae,
tentuang pesone, jasang pettue singkerruange, deceng kapang ri puange,
tonangeng saliwangenna, watakkale saupole sumange’e.
2. Nomoro
dua. Seroi bujung temmettie, naenceng pulana paddissebngemmu. Atutuiwi lampu
teppeddewe nattappal pulana teppe’mu. Bole-bolei tonangeng malessie
namannennungeng paringerrammu
3.
Matellunna. Amala paddissengemmu, teppe tentuammu, appassewwang nyawa
pakkasiwiang passompamu, atabbuttureng pakkitammu ri rupanna ka’ba kaosaini
pannassaengi atangenna atae ria pungenna puange.
4. Maeppana.
Pallebbanni koromai sompe’na sampang teppe’e naripallabbangi nasaba amal saleh,
namattipi insyaallah topada mallabu ri akhera nasaba ati caddio rennu pulana,
mangolo temmabboko sitangareng puanna, carilla-killa ri nyili pada uleng tepuri
tingarae cayyana. Limbang ri pammasareng ri kira-kira toni ri letenge ri
mannippi, nauttama ri suruga pammasena puang allah ta’ala.
Walai paccappureng
ada
Senge’ka ri
labbu’e ubali senge’ki ri gollae, tosipaggalelu ri kalukue to siruntu-runtu ri
onde-ondewe, senge’ka simata jarung ubali sengekki si puppureng lino. Narekko
massarakki baja sangadie napoleiki uddani congaki ri bittarae to siduppa mata
ri kettengnge, engkatu bunga-bunga sitakke utanangekki, narekko makalle’i
daunna taboloreng manika kasi nasaba wae mata, sarekkoammengi engka mancaji
passengereng pallawa uddani.
Narimakkuannanaro
pada laoni mai to millao doang ri puang allah ta’ala pada pangngolo madecengi
ati mapaccitta lao ri puang sewwae ri makkedatta: e..puang, tapalaloka pangoloi
atikku nenniya watakkaleku lao riolo arajatta puang, de’gaga akkatta laing
sangadinna maeloka pannessai majeppu iya toripancajittaka puang nenniya de’gaga
elo ulleku sangadinna elo ulleta puang, tenriulle bilangi atassalakku nenniya
atakkalupakku iya pura maddioloe, nassabari namalucca atikku nasaba engkaku
salaiwi apatiroatta puang. Namajeppu sitongettongenna masiri-matane’ka pangoloi
atikku makkai due limakku nennia suju riolota puang sarekkoammengi tapalaloka
marillau ri idi puang. Naiyakiya E...puang narekko de naokko ri aleta
upangngolo alusukku nennia kassara’ku majeppu de’nagaga angngolokku lainge
puang, nasaba pura utentuangi ri lalenna ati kaminang marilalekku makkeda
de’gaga adele ri sesena adele’tapuang, de’gaga ri ase’na akuasangetta puang
nennia de’gaga pappoji ri ase’na pappojitta puang, de’gaga pammase ri ase’na
pammaseta puang. Narimakkuannanaro taddampengekkapuang sarekkoemmengi leppeka pole
ri cappa’na cerita ja’e, nassabari nonnoka ri yawana pettu
paddannuangnge.iyatonaro nassabari naengkaka mangngolo ri olo arajatta puang
sarekkoemmengi tatarimai angolokku lao ri olo alebbiretta puang, nasaba idimi
bawang puang maraja addempeng namaraja akkamase.
E... puang
purani wola perrie nenniya sussae ri pettang kapae naiyakiya gau mannessae,
majeppu pettang kape’na lino denaullei kalai pettang kape’na laleng kubburu ri
sesena tau takkalupae sukkuruki pappedalle’ta puang lebbi-lebbipi ri sesena tau
iyya massakkerengi puang. Sewwa wettu matti gau mannessa ri olai laleng
amatenge, ri puttamaki ri calori’na kubburu’e tajengi wettu paccappurenge ri
lino wanua cinampe’e, naiyakiya napakarajengenga addampeng puang, nasaba
cakkana annassana amatenge riseseku naiyakiya tannassabari na tattamba
teppe’ku, tennassabari na tattamba paddissengeng ninniya amala madecekku,
yakkeppaha de wissengi aleku, takkaboroka nennia takkalupaka sukkuru, padahal!
Pura riwerenga dalle nenniya papenyameng temmaggangka naekiya de usukkuruki
puang. Tawerenga mata, tannia appunnakku puang naekiya simata-mata appunnatta
tapinrengika, narimakkuannanaro sitinajai upakkeguna matakku molai apatiroatta
puang, bacai kitta malebbitta puang naekiya taddempengekka puang, nasaba de
upakkegunai pakkitakku lao ri laleng taporio’e puang.
Maleddeka takkalupa nenniya tassala
paung nassabari de namakkiengka atuo2ngekku ri lino puang. Tawerennga jari
sitinajai upakkigunai ri laleng madecenge sappai dalle hallalata, tulungi duwae
pajajiakku,tulungi balibolaku nenniya sikampokku. Naekiya yakkeppaha
upakkegunami jarikku malai waramparanna tau lainge,
e... puang sitinajaka mappideceng lao
duwae topajajiakku nasaba ale malebbi’na nassabari telleng ri lalenna
lino.sitinajaka turusiwi passurowanna, sitinajaka jampangi riwettu malasana,
sitinajaka engka riseddena ri wettu napperelluakku naekiya takkalupaka puang
mabbali-balika ri laleng pangaja’na, ugerra-gerrai narekko mabbicaraka sibawa
duae pajajiakku, usalai ri wettu malasana, mabelaka ri wettu napparelluakku.
Madorakaka ri duae pajajiakku puang, nappaka massesse kale naekiya de’nigaga
pajajiakku puang lisuni ri onrong mannennungenge.
Eh... puang
tappelettukakka sellng uddanikku nenniya ellau addampekku, sarekkoammengi
naddempengengi sininna dosa-dosaku lao ri alena puang, nasaba manrasa-rasaka ri
lino puang, temmattuju jama-jamakku, tappolei dalle masempota puang, nakanna
adanna to riolota ri makkedanna “nigi-nigi madoraka lao ri duae to pajajianna
makkatenningi namarunrung makkalejjai namaruttung, mappokka panne pute, mareppa
lebu telloi, mappettu sampengi, mapolo sangila, teccokkong temmaccolli,
tennacekkengi peppaja, temmitai deceng lino nalebbippaha deceng akhera.
Eh...Puang narekko uwingerrangi eganna
dosa pura upogau, sitongettongenna de napusitinajai aleku mancaji lise suruga
puang, naekiya maleddeka matau lolongengi paccallatta nennia pellana apinna
ranaka, narimakkuannanaro taddempangekka puang, tassengekka babua puang,
tatarimai toba’ku, tapalomoi urusan linoku makkutoparo urusan akherakku puang,
tapancajingekka lalekku laleng malempu, pada lalenna ri poriota puang, tannia
lalenna tau ri ceccata na sarekkoammengi to pada salam ri lino nennia pada ri
lolongengi pammasena nennia pakkamasena puang allah ta’ala matti ri esso ri
monrinna insyallah. Amin ya rabbal alamin.
اللهم اغفر للمسلمين و المسلمات و المؤمنين و المؤمنات الأحياء منهم و الأموات إنك سميع قريب مجيب الدعوات برحمتك يا أرحم الراحمين.
Selesai....
Tentunya harapan besar kepada semua ummat mukminin kita semua menjadikan hari ini hari istimewah kepada semua ummat muslim dan menjadikannya hari bermakna.
Souce : Ustadz Bugizi Alhakz
Note : Mohon maaf apabila ada ayat alqur'an yang terbalik
Tags : Khutbah bahasa bugis, contoh khutbah idul adha dalam bahasa bugis, Khutbah singkat idul adha dalam bahasa bugis.